每年的母親節，都是平日無時間陪媽媽的子女的「反省日」，尤其對早出晚歸甚至返夜班的仔女來說，陪阿媽簡直算係奢侈的活動。蕭浩明（小明）同朋友夾份開酒吧，夜晚返工日頭瞓覺，雖然住埋同一間屋，但一個月都同阿媽（心姨）講唔夠十句嘢（相信好多人都係咁？），這次果籽就𨘋請佢試試跟足阿媽一日，阿媽平日做乜佢就要做乜，體驗一下阿媽平日過的生活係點！
要跟心姨過一日其實一啲都唔易，皆因心姨每日日程仲密過個仔，「我一早去做兼職，之後買餸，回來執拾一下家居，下午接小朋友來家裏補習，夜晚煮飯，就這樣啦。」小明呢日第一個任務，先係跟阿媽去接小朋友回來補習，「我以前都有幫過手教補習班，但只是在學校裏幫學生對功課，現在要管接管送其實都幾頻撲。」眼見小朋友都聽教聽話，而小明對功課時雖然粗聲粗氣但亦算細心。心姨教補習班都有十多年經驗，起初是教會工作，現在教會停辦她亦繼續幫手，所以收費亦相對便宜，「收得平仲俾埋茶點小朋友食，簡直蝕本啦！」口裏是怪阿媽唔識賺錢，實在也不過心痛阿媽蝕底。
兩小時補習完成，小明就陪阿媽去買餸，「佢鍾意食咩？我真係唔知道！我打算煲個湯啦，因為我喜歡飲湯，我媽平日會煲湯俾我飲，今天就煲給她。」除了湯，心姨還建議了煮平日自己喜愛吃的蒸魚和雞翼讓阿仔大顯身手。說是跟阿媽一day，但係講到揀靚餸，都係阿媽出手居多，阿仔都是付款和拎餸啦。
本來相安無事，一踏入廚房就開始有火藥味啦！「我真係好擔心你點煮飯俾我食！我又要洗多次！」原來心姨嫌小明洗嘢求其，自己要再洗確保「安全」。「其實高溫煮熟就無菌啦。我個人是較馬虎的，但她就太按步就班一定要做齊每一步。」雖說小明洗嘢俾阿媽扣分，但因為在酒吧工作不是要處理食物，切嘢方面都頭頭是道，至於點調味同點煮，當然都要返心姨出手。
「其實煮這些無難道啦！唔會唔好食，況且他煮乜我都會鍾意。我覺得煮什麼都不是問題，他煮不煮都不是問題，最緊要常常可以坐在一起吃飯，那個才是最開心的時候。」煮完要阿媽收拾廚房殘局好像是要仔女煮飯的必然定律，但吃進口裏，每一啖還是始終甜在心。
小明表面很cool，其實內裏都是很sweet的，知道阿媽最叻扭波，呢日亦試試這門手藝，在阿媽教導下，終於整咗一朵汽球花送給她。「今日非常充實，亦都相當辛苦，原來我媽每日的生活是這樣忙，鏡頭拍只是這些部份，但我知道阿媽還有很多其他工作要兼顧，所以真的辛苦她了，我永遠都會祝她身體健康，這是最重要對她來說。」
跟住阿媽過一day，你又夠唔夠膽挑戰？
記者:容慧心
攝影:梁志永