雷神莫雷拉這天第二場贏大熱「駕喜」捧走張奧偉盃，不過之後陷於苦戰，未再入凱旋門，到了第九場更功敗垂成，遇意外應贏變輸，人算不如天算。
第九場三班草地1400米陳祖澤錦標，雷神騎蔡廐3倍馬「有心人」原本有機會重新贏馬，可惜呢匹大熱門直路初於內叠塞車冇位出，到望空逐步追上，看似有機會趕過內側已突圍的「瑩然英峻」之際，「瑩然英峻」鞍上人郭能雖不停打左手鞭，但「瑩然英峻」似睇「有心人」唔順眼，急劇外閃挨撞「有心人」，雷神勒避一收慢「有心人」即影響走勢，最終不敵「瑩然英峻」屈居亞軍。
相反來自蘇保羅馬房的四歲自購馬「瑩然英峻」，夥拍郭能爆27倍冷Win開齋，組合獨贏開A3並派27.5元。
郭能連同頭場泥地贏賢廐「至尊駿爵」在內，這天一泥一草起孖，而佢對上一次贏馬於4月16日，巧合地亦是在周末沙田日賽，以一泥「元豐泰」及一草「無敵飛龍」起孖。
今場三、四名由落飛馬「情趣」及半冷門「恆駿寶駒」瓜分，四重彩派11萬幾。
同場次熱摩廐「勇士勁」當閘廂開啟時，前後四隻腳屹立不動，拒絕展步，競賽小組研訊後裁定此駒已獲公平出閘，馬迷投注遂當輸，不獲退票。