曼聯喺今季英超冇份爭標，連前四位置都唔樂觀，不過班預備組球員就生性，已經鎖定咗今屆U21英超錦標。紅魔喺上周五進行今季最後一場比賽，雖然只係例行公事，但一樣踢出火，因為一次粗野攔截搞到雙方加埋成17個球員發生衝突（圖）；場波最終曼聯U21以1:0小勝。曾經被譽為曼聯明日之星嘅曼聯翼鋒贊奴沙亦喺呢場波傷癒復出，到上周六仲即刻喺英超候命。同樣最近傷癒嘅守將菲爾鍾斯就有不同遭遇，佢喺比賽末段一次攔截拉傷大腿，要拐吓拐吓離場。