去年半山般含道石牆老樹忽然被斬，引來全城熱議，明明樹木安全報告指未有倒塌危險，老樹最後卻含冤告終，唉。太平洋另一邊嘅三藩市，同樣出現咗斬樹風波，但幸得全城出面制止，連官司都打贏埋，最後有個happy ending，好羨慕。
事緣幾年前，有位男士於當地買屋，認為後園嘅五棵老松樹阻礙佢擴建房屋，所以前後揮刀斬咗四棵樹。隔離鄰舍實在睇唔過眼，覺得呢幾棵百年老樹係區內嘅地標，雖然唔係稀有品種，亦未去到金門大橋咁出名，但個感覺就好似(以前)你每次見到石牆老樹都會知自己正身處般含道，有種特別感情，所以區內居民同心協力叫停斬樹男，仲申請臨時禁制令唔俾斬樹男靠近棵樹。事件糾纏左幾年，居民萬眾一心，又打官司，又請願，最後市區樹木委員會被居民誠意感動，將僅存的這棵百年老樹封為三藩市地標，斬不得，老樹有救。諗返我城，如果每件事都可以有商有量，而唔係充耳不聞一刀切，一切可能不至於此。
記者：盧懿靜
資料來源：Los Angeles Times