上周五NBA季後賽，馬刺喺西岸準決賽以100:96險勝雷霆，並喺七場四勝制中領先2:1。唔知馬刺係咪想擾亂雷霆軍心，同日竟然傳出想撬走杜蘭特（Kevin Durant）嘅消息。
當比賽剩餘25.9秒，馬刺只係領先雷霆96:94時，今場攻入24分嘅阿域治（LaMarcus Aldridge）射失波，尼納特（Kawhi Leonard）再搏到盡搶到關鍵嘅進攻籃板，球迷明顯睇到「銀黑兵團」嘅爭勝決心有幾高。馬刺最終以四分險勝，交出「雙雙」31分11籃板嘅尼納特喺賽後表示：「我當時乜都冇諗，只知道自己要盡全力搶番個波。」
今場轟入全場最高31分之一嘅雷霆控衞韋斯卜克（Russell Westbrook），對於球隊輸波亦好無奈：「我哋喺一分鐘之內，由原本落後九分，將差距縮到只剩兩分；球隊都打出嚴密防守，逼到阿域治炒粉，但最後竟然俾尼納特搶走進攻籃板，真係好難受。」今場攻入26分嘅杜蘭特即將變成自由身，唔知馬刺係咪想同雷霆玩心理戰，ESPN喺同日竟然傳出佢哋打算喺今夏撬呢位球星過檔嘅消息。
馬刺險勝雷霆領先2:1
今場後備上陣攻入五分嘅真路比利（Manu Ginobili），已經194次出戰季後賽，超越𠵱家做緊塞爾特人總經理嘅安治（Danny Ainge）同「郵差」馬龍（Karl Malone）升上第九位，同時成為季後賽出場次數最多嘅次輪選秀球員。