家居充滿色彩，視覺上多姿多采，營造開心氣氛，感覺似樂園。單位不一定要大，地方小小，彼此親近一點，反而更溫馨，這個公屋安樂窩，面積只約380方呎，經過精心策劃編排空間，甚至作出改動及偷位，才能住得愜意，滿載歡欣。
記者：溫潤潔
攝影：黃耀興
物業屬於Y型公屋，單位原則無廳房間隔，現於窗前以衣櫃間出兩間房，夫婦、兒子及外傭恰好夠分配。主人房放雙人床，貯物量亦都要多，內櫳較大可以理解，衣櫃做粉紫色軟墊門，是女戶主喜愛的顏色，質感舒服，當靠背床頭板用也不俗。
兒童房以車做主題
兒童房雖的骰，但以車主題來佈置，成為全屋得意傑作。房內五顏六色繽紛搶眼，上格床欄做黃色跑車，彷彿等待側旁高櫃圖案紅綠燈，又或對面衣櫃頂飾面黑白旗幟揮動就出發。下格床及衣櫃底以藍紅色相間，聯想起經典火車卡通片，𠱁得大人細路都鍾意。
客飯廳訂做電視地櫃、大櫃及層架，以白色加灰鏡簡單款式，可保留空間感，亦可讓焦點落在歐陸式木餐枱及木椅之上，牆身掛上懷舊鐵花時鐘及掛畫，清淡對鮮色平衡有道，視覺上不太膩。
為了靚又合心水，浴室訂製卡通公仔馬賽克，鋪砌企缸旁一壁，大大幅頂部有藍天白雲，底部有植物為伴，構圖比例做到最佳效果，增添不少趣味性。
兒童房改趟門更鬆動
單位細小門位多，設計上要多花點心思，例如兩房遷就中間衣櫃及客廳進出通道，房門只做20吋闊，比起標準少約8吋。因應兒童房間較細，改用趟門，可完全推開，出入更鬆動。
原則浴室入口向客廳，改為面向飯廳，騰空本來位置放電視櫃，對面可放梳化，間隔整齊歸一。新建的浴室入口側旁保留喉管箱不好看，以白板遮蓋較雅觀，兼且予小朋友寫字畫畫，做法經濟又實用，全屋裝修不消33萬元，算價廉物美。
物業：青衣長安邨
實用面積：381方呎
家庭人數：3人連外傭
設計及裝修概念屋（2773 6829）
歡迎讀者提供單位拍攝及介紹，請將資料傳真2370 3886或電郵mailto:[email protected]