去年底成立、諗住嚟緊9月派人參選新界東、西嘅香港民主進步黨，噚日開記招（圖）宣佈改變部署，嚟緊9月會狙擊以黃毓民為首嘅選舉聯盟，並優先考慮喺毓民極可能出選嘅九龍西派人出選，點解咁大仇口？
該黨創黨臨時幹事長楊繼昌就解釋，因為黃毓民只識煽動民粹，並非真心相信及主張香港自決，佢嘅支持者仲講過梁振英唔連任，會影響本土運動發展。
至於楊繼昌會唔會親自上陣挑機？佢話會留番畀黨內年輕黨員出戰，又覺得青年新政游蕙禎本土理念相當唔錯，若然青政同意，香港民進黨願意全力為游蕙禎助選，但一切要視乎青政反應喎。
楊繼昌又話，佢哋會喺人大委員長張德江訪港時發起示威，佢本人為爭取直接向張德江提問，到時或會赤手空拳衝擊警方防線，又表明唔會迴避刑責。