獲得里約奧運入場券嘅港將陸續有嚟！香港輕量級女子雙人雙槳艇嘅「真．姐妹」組合李嘉文同李婉賢，就為港隊再添奧運資格，佢哋上月喺南韓舉行嘅亞太區奧運資格賽，僅以0.19秒得梗頸四；但亞軍嘅南韓隊噚日宣佈放棄資格，由呢對姐妹檔補上，令香港奧運代表團人數增至24人（見附表）。
繼前日最終里奧排名出爐，香港羽毛球隊有歷史性最多七人出戰後，噚日香港賽艇隊就宣佈嘉文同婉賢拍檔嘅輕量級女子雙人雙槳艇項目都獲得奧運資格！呢張入場券得來不易，佢哋兩姐妹上月喺南韓舉行嘅資格賽要爭取前三先可以入奧運，結果以7分07秒51得第四，但最終南韓因有多於一隊女子隊入圍而放棄資格，令入場券失而復得。
嘉文淡然 婉賢興奮
繼2008年京奧後第二次參加奧運嘅家姐嘉文話：「我覺得我哋始終係輸咗0.19秒，所以自己相比其他人嘅感覺較為平淡。反而最開心應該係可以同阿妹一齊划雙人艇去參加奧運，希望做到前16名。」至於首次有得去奧運嘅婉賢就話：「我比完賽就病咗，到噚日先可以親口同人哋講多謝。同家姐一齊去奧運好難得，本身都冇諗過，要多謝教練白勵畀呢個機會我哋去夾。」婉賢又話，係家姐一句「係咪想去奧運㗎」令佢努力訓練，最終如願以償。兩人嚟緊將會同男子輕量級雙人雙槳艇代表鄧超萌、趙顯臻，到日本同波蘭等地備戰。