由國際特赦組織香港分會，香港外國記者會及香港記者協會合辦，第二十屆人權新聞獎揭盅。《蘋果》靜態組及攝影組共奪三獎項（圖）。《蘋果》靜態組記者梁御和、袁柏恩、林偉聰及李雅雯去年調查葵涌大白田及紅磡選區嘅區選種票報道，獲中文突發新聞優異獎。攝影組陳奕釗喺去年光復元朗運動拍下嘅「光復元朗第一滴血」，以及易仰民拍攝嘅「英女同志被歧視」新聞圖片，分別獲突發新聞圖片優異獎。
另早前憑「海鮮背後的勞工」報道獲頒普立茲新聞獎嘅美聯社記者，憑同一報道奪得英文新聞人權大獎。
有份創辦人權獎、時任國際特赦組織香港分會主席嘅Robyn Kilpatrick憶述，97回歸前夕，市民對回歸後人權自由感憂慮，於是佢聯絡本地兩記者組織，創立亞洲人權新聞獎，冀鼓勵新聞界積極報道人權新聞。
國際特赦組織香港分會總幹事歐美寶話，現今市民對人權嘅認知越見廣泛，不過政府對改善人權工作唔足夠，保安局前局長李少光等高官仲話要考慮香港退出聯合國《禁止酷刑公約》，情況令人越嚟越擔心。