【親子籽：胚芽故事】
越來越多後生仔女紋身，縱然變得普遍，但世人眼光仍是狹窄，身上有幾個紋身，走到街上總會被人「眼超超」。身體髮膚，受諸父母，路人眼光大可不理，但父母看見子女滿身紋身，會有甚麼感受？當媽媽的，看見女兒將自己的樣子紋在身上，會心痛還是心甜？愛女紋到一身公仔的吳媽媽呂麗芳就會答你：「幾好吖。」
26歲的吳詠斯（SiSi），樣子斯斯文文，一頭清新短髮加上白皙皮膚，高瘦身材，看上去是個乖乖女，但她脫下外套，露出兩截約有十個紋身的手臂，我有點意外。SiSi自小便覺得舅父紋在手臂上的一隻燕子很得意，長大後看外國電影，見到很多女星都有紋身，又覺得好型，所以早已決定18歲後要去做這事。當年為她畫上人生第一個紋身的，是當時剛冒起、現今已成為香港炙手可熱的女紋身師Joey Pang，在她耳背紋了一個由兩個S字組成的蘑菇形圖案。
當年SiSi紋身前並無正式通知過媽媽，來一招先斬後奏，紋完才知會對方。紋身是一輩子，冇得返轉頭，不怕媽媽反面嗎？「由細到大都不斷同媽咪講要紋，佢都冇乜反應，冇話贊成定反對，佢不嬲都畀好多自由我，知佢應該唔會嬲嘅。」SiSi是獨生女，父母在她年幼時離異，一直跟媽媽住，吳媽媽生女時才24歲，早結早離，年輕時便要一個人帶着女兒東奔西跑搵食。後生仔女去紋身，最大阻力多來自父母，十個有九個反對，SiSi媽媽是第十個，問皮膚有點黑、手腳沒有任何「公仔」的吳媽媽有甚麼看法：「幾好吖，幾靚呀，我都想紋，不過怕痛之嘛。」
自由放任唔多管 母女關係更佳
從小到大，吳媽媽對女兒都採取自由放任政策，不會特別管束，「我唔會煩佢，仲會畀自由佢，㩒住佢都冇用，一陣反叛離家出走咪仲衰！我屋企人都有紋身，所以一直接受到呢樣嘢，OK吖冇問題。」她形容自己是慈母，「不過慈母多敗兒囉」，訪問期間又不時笑女兒低能、好煩，SiSi都笑着照單全收。吳媽媽一個人撐起頭家，生性獨立，所以她也從小訓練女兒獨立，小三便要求她獨自由沙田住所坐巴士到她位於灣仔的工作地方。SiSi中學時試過失戀𠝹手，喊到坼天，吳媽媽也只會用激將法去安慰女兒，「以前住17樓，佢見我喊成咁仲叫我跳落去，佢知我一定唔會咁做先咁講，激將法呀。」SiSi說。媽媽年輕又開通，二人的關係似朋友多於母女。
SiSi幾乎每年新增一個紋身，由原先耳背小小的一個，再紋一行字、一個小扣針、一排蘑菇、一隻雀、幾隻北極熊和企鵝，再加一堆宇宙太空船圖案……紋身也越來越大，原本白皙的雙手，已逐漸被紋身覆蓋。女兒紋一個時覺得沒問題，但現在越紋越多，還接受到嗎？吳媽媽瞄瞄身旁那位頸部、左右手、背脊、腰間，甚至整隻右腳都是紋身的女紋身師Cash說：「唔好誇張到佢咁就得。」SiSi身上紋的不是龍虎豹，也不是書法字，全部走可愛路線，吳媽媽後補了一句：「老實講，如果佢紋龍虎豹嗰啲就唔接受。」
唔怕老闆白眼 只怕男友家人嫌棄
做媽媽的不介意，但殘酷的現實社會是以貌取人，女仔紋身出街遭白眼是等閒事，SiSi樂於活在自己世界，不加理會，反而媽媽替她緊張，「喺街見有人眼甘甘望住佢，我咪睥番佢囉，紋身有乜問題先？」帶着紋身去見工，總有點輸蝕，不是個個老闆都能接受，雖然任職帽子設計師的SiSi現在有自己生意，但難保將來有外出打工的一日，吳媽媽擔心過這方面嗎？「唔擔心嘅，我知寫字樓嗰類工都唔啱佢做，冇乜影響，反而擔心佢將來的另一半家人點睇佢，始終係女仔，紋咁多公仔上身。」幸好SiSi的男友同樣是紋身癡，比她還要多「戰績」，SiSi的未來奶奶亦已表示不介意。
吳媽媽接受程度大，以為她沒有底線，她卻說：「惟獨最接受唔到佢以前細個去釘耳窿，耳骨釘到成排都係！」自認衰女的SiSi，反叛期早在小學開始，小六時貪靚去穿耳窿，在耳骨耳門位置穿了十多個，那是吳媽媽唯一一次向女兒訓話幾句，「佢咁細個未識顧掂耳珠個傷口，發晒炎，所以唔想佢釘咁多，唉，但唔釘都釘咗，都管唔到佢，惟有叫佢小心處理傷口囉。」
SiSi早幾個月還將紋身伸延到小腿。記得在訪問前與她通電話，她說：「早排我紋咗媽咪個樣落小腿。」吓？紋阿媽個樣咁激？我聽後驚訝得瞪大眼睛。「人越大越驚失去，人大咗，一定會經歷生老病死，有日突然有個念頭，想紋媽咪個樣，就去做囉。紋之前同媽咪提起，佢仲好雀躍叫我快啲去。」訪問時終於看到紋身，電曲髮、戴黑超和headband、還有珍珠耳環和頸鏈，和吳媽媽真人有幾分相似，甚至更型格，「其實紋呢個樣，係我幻想佢未生我之前好有型，由細到大都係佢一個人湊我，揸車帶我周圍去，其他人可能係爸爸照顧成頭家，但我媽咪一個人做晒兩個角色，我真係覺得佢好有型。」
這次紋身，SiSi還帶怕痛的媽媽一起去，「想畀佢體驗紋身係點，痛唔痛，紋佢個樣嘛，俾佢監吓場，令佢放心啲，俾我紋多啲。」內斂的吳媽媽，看到自己的樣子在女兒小腿出現，甜絲絲得來又帶點靦腆地說：「幾好幾似吖，靚呀。」SiSi更踢爆吳媽媽即時拍照放上facebook呃like。此外，兩母女都是狗癡，家中養了五隻狗，最近又領養多一隻，吳媽媽說：「紋身會上癮，同養狗一樣。」SiSi便在周邊紋了家中五隻小狗的樣子，六個cutie圖案在左邊小腿外側，其實幾突兀，但有幾分稚氣。
兩代女強人 互相欣賞
如今SiSi是帽子設計師，六年前創辦自己的品牌「無所事事」，擁有自己的工作室，做得有聲有色，吳媽媽則是業餘花藝師，二人不是同住，但每天都會一起在工作室工作。然而，兩人平日溝通不多，正好趁今次訪問來個真情對話，SiSi覺得自己在媽媽眼中，是個三分鐘熱度的人，而且周身刀冇張利，但原來對方並非這樣想，「我好欣賞阿女咁細個就自己創業，我喺佢呢個年紀時都係生完冇耐，渾渾噩噩，佢咁快做到自己品牌，靠做帽搵到食，真係好叻女。」
SiSi則覺得媽媽是女強人，「我好依賴，佢超獨立，有乜都自己攬晒上身，唔會靠男人。」她自小便跟着媽媽周圍去，習慣在大人堆中生活，「細細個佢已經帶我去玩去唱K，好細個已經經歷咗呢啲嘢，大個反而冇學壞，其他同學嘅家人可能覺得我曳，但我唔會理佢哋嘅睇法，我有我生活嘛，媽咪俾自由我，令我可以睇吓自己潛力去到邊，冇人管住會發揮得好啲。」看着吳媽媽在訪問期間不斷細看女兒的紋身，一邊好奇的問這問那，又甜絲絲看着女兒小腿上自己的樣子，就知道她以這個紋身女兒為驕傲。
記者：黃子配
攝影：徐振國
編輯：李寶筠
美術：利英豪