車路士今季英超雖然衞冕失敗，但無損佢哋推出新波衫嘅計劃。日前佢哋件2016/17球季主場波衫面世，普通版賣55鎊，落場版就賣90鎊，如果熨埋球員名、號碼同埋英超徽章，埋單要成1,700港紙咁滯；而車仔就強調件落場衫，真係球員落場比賽嗰件，所以絕對係物有所值。另外，盛傳有份逼走摩連奴嘅夏薩特季尾回勇，近兩場聯賽入三球；日前呢位25歲比利時國腳中場仲表態，話下季希望留隊，同新上任嘅意大利籍領隊干地合作，齊齊搞番起隊波。