李城贏咗英超冠軍，派頭都唔同啲。球隊喺周四召開主場迎戰愛華頓嘅賽前記招，一如所料梗係吸引咗大批記者到場，球會亦準備咗香檳（圖）招待佢哋。到主角雲尼亞里入嚟嘅時候，全場所有人都熱烈鼓掌。雲帥冇因為榮升做英超冠軍教頭而大鼻咗，一如以往先同在場每位記者朋友握吓手先。雲帥喺記招透露意大利歌劇家波伽利（Andrea Bocelli），會喺周六場波嚟到皇權球場獻唱。不過，李城賽前收到壞消息，中堅賀夫上仗同曼聯中場費蘭尼有衝突，一個拉人頭髮，另一個開踭，結果齊齊被英足總秋後算賬罰停賽三場，意味住賀夫提早收「咧」。