九龍灣MegaBox宣佈，將於5月15日及22日舉辦「一折激安感謝祭」，40間商戶齊齊提供逾1200件貨品，大部份一折發售，由家具、床上用品、服裝至食物都有！
其中最吸睛莫過於法國STAUB廚具十八件套裝，原價15,459元，破底價1元發售；仲有不少超筍電子產品，例如Samsung43吋LED電視，原價4390元，一折後500元有找；9.7吋iPad Pro 32GB WiFi版只售458元！亦有16GB的iPhone 6s以一折558元發售。場內最平為0.5元的旺旺小小酥，不過限買一件，無理由咁無大志啩！
想去搶平嘢就要留意，「一折激安感謝祭」分兩日進行，有唔同的貨品減至一折，建議大家上網睇定要買咩，當日10點前往L5中庭排隊領購物證，先到先得，11點開售後，顧客憑籌可於場內選購1件一折貨，在場職員確認後，就可以以「現金」方式於收銀處付款。
成功付款後職員會畀封貨品換領信到相關店舖拎貨，部份貨品為陳列品，特價貨品亦不設拆貨、送貨、安裝、換貨、退貨、售後及保養服務（特別註明之貨品除外），所以畀錢前記得check 清楚喇！
先有沙田IKEA一折清倉，再有MegaBox又話一折感謝祭，一田都公佈五月優惠日將喺今個月26到30日舉行，床上用品同廚具等等低至三折。
唔想排餐死又逼餐懵的話，一田喺16號至20號推出「優惠日eShop」，留意返，網購送貨的話要加50蚊。大家亦可以網上買完，喺門市自取慳返幾十蚊。驚到時「人多擠逼」連網站都load唔到？公司市務部總經理謝素嫻話，有過上年經驗，唔擔心網站負荷唔嚟。
呢間又大減價，嗰間又話有優惠，大家小心今個月買到破產。