2005年被揭發婚外情旋即辭去特首辦主任嘅WK林煥光，喺梁振英上任特首後「翻生」。如今貴為行政會議召集人嘅林煥光，噚日喺商台節目《雲常開》提到當年呢件事，話當年婚外情一被揭發，即時辭職係為咗保住時任特首董建華：「我第一個考慮係唔好連累董生，因為董生喺2003年大示威、7年經濟衰退，佢受嘅壓力已經好大，我當時即刻走，因為任何理由留落去，都會俾佢嘅政敵用我去攻擊佢。」
WK話，呢件事對佢嘅最大壓力並非冇咗事業，而係點樣面對太太，「我哋冇小朋友就簡單啲。」佢又話當年有唔少市民上前讚佢辭職做得撇脫，而且唔少都係女性。WK仲話試過去快餐店食早餐，有男士走上前同佢分享自己一樣都受婚外情困擾。WK敢做敢認敢道歉，喺今時今日呢個政府，已買少見少。