騎士喺上季總決賽完敗畀勇士，原因之一就係射三分唔夠人嚟。周三NBA季後賽東岸四強Game 2，騎士再喺主場迎戰鷹隊嗰陣突然「勇士化」狂射三分，全場射入破紀錄嘅25個三分球，最終以123:98大勝對手，場數領先至2:0。
騎士開賽初段手感麻麻，打咗三分鐘都係入得兩分，但之後JR史密夫（J.R. Smith）射入三分波就一發不可收拾，越射越過癮不停入，第一節入八個三分破騎士球會紀錄；半場入18個三分破NBA紀錄；到下半場回落番少少都入到七球，全場射入25球三分波，比起由魔術同火箭所保持嘅常規賽單場23球紀錄仲要多（見附表）。騎士今仗射三分仲準過兩分，三分45射25中，命中率達55.6%；而兩分只係42射16中，四成唔夠。全隊13個球員有份上陣，得三位冇入到三分波，JR史密夫就入全場最高嘅七球。
領先2:0占士想鬥獲迪
騎士領先兩場晉級形勢大好，但主力勒邦占士（LeBron James）似乎樂觀過頭，賽前已經講話想喺東岸決賽同佢老友獲迪（Dwyane Wade）領軍嘅熱火碰頭；熱火𠵱家喺東岸四強同速龍有排打，占士咁講似乎對後者有欠尊重。不過，當佢喺周三賽後被問到係咪會接拍電影《太空也入樽2》，又答得有紋有路：「𠵱家我哋喺季後賽打生打死，唔會俾其他嘢分散我嘅注意力。」
