英超冠軍李斯特城將會喺周六迎戰愛華頓場主場聯賽捧盃，話晒狐狸捧英超係歷史性時刻，隨時係可一不可再，所以皇權球場啲波飛梗係俾人炒貴晒啦。呢場比賽啲波飛原本分四種，分別係30鎊、30至50鎊、40鎊，同埋40至45鎊，但消息指，坐喺李城主場區嘅波飛，最平都俾人炒高至1,700鎊（約1.9萬港元），最貴就去到7,920.5鎊咁誇張，計起上嚟要成八萬九千幾港紙，真係車都買到一部；至於坐喺客隊愛華頓果邊就平啲，但都要成434鎊。