之前英國傳媒吹到行，話摩連奴今夏會頂雲高爾個位教曼聯，但點知雲高爾帶帶吓又帶到曼聯入英足盃決賽，搞到紅魔高層唔好意思炒人。點算好呢？英國《太陽報》透露，曼聯𠱁緊摩連奴，叫佢不如等多年，等雲高爾下年夏天約滿、光榮退休之後，先嚟奧脫福教波。摩連奴當然唔想啦，但據聞有中超球會睇中呢個千載難逢嘅機會，想搵摩佬嚟教一年，畀佢賺完人仔後再教紅魔。另外，曼聯左閘勞基梳爾送咗張英足盃決賽門票畀一位患上腦癌嘅曼聯球迷，呢個關懷球迷嘅心值得一讚！