CEC國際（759）老闆林生上星期高調表示，未來759阿信屋唔再不停做假日689折優惠，4月尾做完最後公價、正價、街坊價7折後，5月開始大部份產品回復公價。消息一傳出，唔少顧客把握最後機會去阿信屋掃貨上倉。
記者分別於上星期六（4月30日）以及今個星期二（5月3日）光顧阿信屋，先於上周六7折之際買18件人氣產品，再喺本周二，公價及正價貨品有88折時買相同產品，睇吓貴咗幾多。
記者買入18件熱賣貨品中，有5件為超抵價，12件為公價，1件為正價貨品。上星期六，即公價、正價、街坊價享有7折時，18件貨品折扣後埋單總數224元。
到本星期二晚，記者再去同一間分店，發覺人流大減，成間舖只有兩母子顧客，埋單都只是三數十元。當日記者再次購買該18貨品，埋單要263.7大元。
相同嘅貨品，上星期六只需224蚊，今個星期二買就要263.7蚊，足足貴咗17.7%！「加價」最多嘅係MARUTAI拉麵，兩日差成27%！其他公價及正價貨普遍貴約兩成半。
老闆林偉駿上星期曾表示，5月起陸續將所有貨品變做「公價貨」，於5月逢星期一至四，除了超抵價外，其公價貨享88折優惠，周五至周日享77折。話口未完，阿信屋又宣佈，今日起至星期日（8號）期間，憑會員卡購物滿300港元或以上，同樣除了超抵價外，其他產品均享66折優惠。