每年一度嘅電訊盈科（008）股東大會，識睇一定要睇電盈忠實股東兼「電盈小股東大聯盟」代表陳仲翔「大戰」李澤楷（Richard）。
不過，可能電盈大搞免費電視ViuTV，造福人群，當中《跟住矛盾去旅行》亦頗受歡迎，陳仲翔今年冇寸Richard，只係借題發揮，問Richard會唔會粉墨登場，拍攝下一輯節目，為ViuTV收視做貢獻。
而Richard噚日睇落心情幾靚，講嘢都特別風趣，指陳仲翔今年嘅提問，係「最唔挖苦我嘅一年」，又笑指暫時未收到《跟住矛盾去旅行》製作人員嘅邀請，「唔知會唔會有一日製作同事，會邀請你同我一齊去旅行，呢樣我可能會考慮。」會場隨即哄堂大笑。
開完股東會後，Richard亦罕有走到台下去同陳仲翔握手，簡直係世紀握手呀。佢亦有同投訴會場太細嘅小股東傾偈，Richard仲話，明年會考慮搵個大場，等更多人可以入去直接向佢提問。
陳仲翔指李「脫胎換骨」
呢招「化干戈為玉帛」似乎幾使得，連陳仲翔都話Richard「脫胎換骨，令我刮目相看」，又話如果真係有機會，一定會同Richard去旅行。
同場亦有股東問ViuTV呢個名點嚟，覺得好難讀，Richard就話，now TV個名都冇中文版，「個名都幾易記，幾好讀，又係市場一哥，市佔率有65%」。佢又笑指，如果股東覺得ViuTV難讀，「其實99台都幾易記。」
李華華
mailto:[email protected]