除咗舜宇（2382）同信利（732）前排升到爆廠之外，其實唔少手機設備股都跑贏大市得幾緊要。近排有兩單新聞值得留意，第一單係小米一季度世界手機銷量排名被VIVO同OPPO超越咗，證明手機生產行業競爭幾咁大。如果手機生產商爭相推新款嚟提升市佔率，受惠嘅會係設備股。另一單係，巨騰（3336）喺咁嘅市道，竟然建新廠，證明電子設備零件真係有得做。
雖然擴產嘅係巨騰，但通達（698）先係主角。通達係手機外殼生產商，早年引入咗金屬納米注塑技術，重點係華為、小米、OPPO、VIVO以至三星呢類熱門手機品牌，手機殼都係使用呢種技術。通達本身就係華為、OPPO同小米嘅外殼供應商，呢三個品牌本來已經行喺市場嘅尖端，即使小米市場地位動搖，但係佢另外兩個客華為同OPPO都明顯上位，通達定單冇得輸。
今年首季，通達營業額按年上升16.7%，公告講到，手機分部貢獻增幅被電器用品及機頂盒客戶的定單減少所抵銷。汽車內飾件業務及精密橡膠零部件業務錄得良好進展。隨住有增長嘅分部業務比重逐步增加，通達收入增長應該keep住跑得快。通達噚日收1.61元，距離15年高位差唔夠一成，股價強勢不言而喻，睇個勢遲早破頂。
晉佳
http://www.facebook.com/advanceguy1