近日政圈流傳，今屆立法會主持財委會出晒位嘅金融界議員吳亮星，有可能退位讓賢，交棒畀同屬銀行界出身嘅海洋公園主席孔令成，令官場同政界關心呢粒「星」嘅去向，不過八方噚日問星爺，佢話接班人唔會係孔令成，言談間又暗示未必一定退。
「希望建制六人組full team留低」
有銀行界中人同八方講，金融界選民得百零人，其實支持邊個，根本唔使投票都知，所以就算當年李國寶長期三點不露，只要有大銀行撐，根本冇人郁到，所以當年孔令成挑戰李國寶，孔就係因後台唔夠硬、冇大銀行支持，結果都係敗陣而回。
星爺之所以可代替李國寶做立會銀行界代表，該銀行界中人直言全因有中銀及西環支持，不過佢任內表現真係太出位，單係李波事件中嘅洗頭艇言論，連一啲中銀高管也大搖其頭，覺得咁樣影響銀行界形象，所以就有人要求換馬，但正如該銀行界中人話，「星爺走唔代表孔令成有機，西環點解唔畀個自己友做，要益你個外人？」
星爺仲同八方講，話自己有接班人好正常，但講明唔係孔令成，係邊個佢唔講，因為選舉涉及好多嘢，包括經費，都係要安全啲，仲話接班人係合適人選，一定後生過佢。不過星爺似乎未必想退，佢話6名建制派功能組別議員組成嘅「六人組」，最近有人強烈表達希望下屆再full team留立法會，仲話「六人組」對此表達強烈睇法，令佢好積極去考慮留低，即係大家仲有機會喺立會睇到星爺出位表演！
李八方
mailto:[email protected]