電訊盈科（008）免費電視ViuTV為打響頭炮，除咗用真人騷同埋韓劇吸引觀眾之外，每個月仲會有一場西甲足球賽事直播。不過最令人期待嘅英超足球，之後會唔會登陸ViuTV？李澤楷喺股東會上答得好坦白，「估計唔會」，原因係投英超嘅成本唔低喎。
佢向股東保證，會繼續播放西甲賽事，又指ViuTV同收費電視now TV「商品化走唔同路線，希望股東兩邊都支持。」
有股東擔心公司為咗發展免費電視台，而令到派息減少時，李澤楷就話當年，指「如果冇收費電視，我哋唔會申請免費電牌照，因為香港市場細，唔平，但有收費電視架構，發展免費電視，整個公司成本比較細」，強調會控制成本，而過去幾年派息都有增加，唔知咁講法，一班揸咗好多年嘅老股東滿唔滿意呢？