隔牆有耳:扮黎明陳恒鑌晒中古「天地線」 - 李八方

隔牆有耳:扮黎明
陳恒鑌晒中古「天地線」 - 李八方

唔少人都鍾情收藏舊嘢,原來民建聯陳恒鑌都有呢鋪癮,而且仲係收藏舊電話。呢期黎天王黎明因為有膊頭、有承擔而成為大紅人,陳恒鑌噚日同八方騷佢部陳年「天地線」(圖),就係當年黎明同阿May(童愛玲飾)「天地情緣」廣告推銷嘅手機。
陳恒鑌同八方講,中學嗰陣因為要幫屋企人做嘢,所以一早就有call機同手提電話,只係佢保持低調,冇畀同學知,加上佢鍾情電訊科技產品,後來換機都冇丟舊機,讀大學時仲開始做埋trade in生意,當係幫補自己嘅開支。𠵱家佢仍然收藏咗廿幾卅部舊電話,天地線只係其中一部,另有唔少70、80後嘅集體回憶,例如港人稱呼做「龜」嘅Motorola Star Tac、被暱稱「蕉」嘅Nokia 8110,甚至Ericsson嘅電話都有。