征戰里約奧運嘅港將數目，噚日終於突破二字頭！國際羽聯噚日公佈最終里奧排名，香港羽毛球隊錄得歷史新高嘅七人出戰，令香港代表團至今已經累積22人成功殺入里約奧運。呢個世界排名積分制自2004年雅典奧運開始實行，港隊今次晉級嘅代表包括男單嘅伍家朗同胡贇、女單嘅葉姵延、混雙組合李晉熙/周凱華，仲有女雙檔謝影雪/潘樂恩，當中阿潘舊年11月喺澳門公開賽決賽整傷左膝十字韌帶，手術後唞咗半年，好彩世界排名依然keep到喺第22位，可以憑住里奧排名第13位，成為16支角逐奧運女雙嘅隊伍之一，仲會拍住上出戰月中優霸盃㖭。