李斯特城英超封王，泰國班主維猜除咗禮拜二請食飯慶功之外，仲大派禮物，每個球員都會獲贈一架價值32,670鎊（約37萬港元）嘅平治B-Class電動車；但對於占美華迪呢啲球星嚟講，30幾萬港紙嘅車真係同玩具車冇乜分別，真係話唔定會畀工人揸去買餸。
華Dee 200萬座駕貴5倍
37萬港紙一架車，喺普通人眼中已經係名車，但華迪就應該唔係咁睇。佢家陣周薪80,000鎊，月薪約360萬港元，真係一個月人工就幾乎買到10架返嚟，同埋佢𠵱家揸緊嗰架藍色賓利GT，我求大俠冇認錯的話，應該值成200萬港紙，維猜送嘅呢架平治連五分一都冇，但話晒班主一番心意，相信華迪都唔會托手踭，咪放喺屋企車房度擺吓，當係紀念品，有需要話唔定畀工人揸出市區買餸。
儘管李城班球員人工唔高，但其實只係對比曼聯同車路士嗰啲球星，同我哋呢啲升斗市民比都係高勁多。因此，一班主將幾乎個個本身都有靚車揸，丹尼森遜同恩拿有林寶，荷西烏路亞就有「波子」；雖然我求大俠有時見馬列斯訓練完都係黐隊友車坐，但相信佢屋企可能有唔少靚車。維猜呢次送嘅平治電動車唔算貴，但成隊波咁多人，條數都幾襟計，估計佢要使100萬鎊去買車送畀球員。
工會總裁話球員抵封爵
比起靚車同錢，話唔定榮譽會更吸引呢班百萬富翁。英格蘭職業球員工會行政總裁哥頓泰萊話，呢班李城球員都值得封爵。喺球壇打滾50幾年嘅泰萊話李城封王係佢見證過最偉大嘅成就之一，簡直超越足球範疇！不過，我求大俠就覺得未免太誇張嘞！反而之前李斯特市議會話，打算用一班冠軍功臣嚟命名當地街道就實際啲，可行性較高，因為有先例可援，𠵱家李斯特都有條連尼加路。
李城封王後，多咗五個國家嘅球員贏過英超錦標，累積加埋55個國家，其中馬列斯係首位贏英超嘅阿爾及利亞球員。此外，泰國高僧又開始作法，為李城下季踼歐聯祈福。
