多長情小股東嘅中電（002），噚日喺將軍澳一間酒店舉行股東會，有成1,527名股東到場，多過舊年嘅1,230人。
唔知係咪舊年派嘅香草種子，要麻煩小股東拎番屋企種，今年中電決定快靚正，人人送隻燜燒杯，仲有兩張廚房防油貼，等班小股東真係用得着。
一般股東會都係送盒點心、西餅，中電可能嫌咁樣太普通，鍾意送特別禮物。好似舊年送嘅種子，就係要帶出綠色環保嘅概念，今年送燜燒杯，好明顯同節能有關。煮熟食物後，唔使長期開住個爐去燜，放入燜燒杯一段時間就食得，咁自然用少啲能源喇。
消費者委員會舊年底特別提醒消費者，燜燒杯冇加熱功能，千萬唔好用燜燒杯烹煮生肉。而放喺杯內嘅食物亦要喺6小時內食用，記住喇。