禮拜六沙田七草三泥賽事，草地用C跑道，睇番3月6日同一移欄八場轉彎路程賽事，總共有五匹頭馬守前兩位入直路建功，其中「乘勢好運」、「飛來猛」及「再開心」更加係一放到底勝出，可見前置馬仍然佔優。今戰列陣馬中，第五場「至尊飛星」上仗正是於田C欄贏馬，亦係全場唯一贏過此移欄之參戰馬，等番強項再跑可添食。另外，第七場「快無極」三次角逐田C欄未失前四名，快馬借助跑道形勢可坐位望贏。
至於三場泥地均跑1200米，睇番今季禮拜六賽事共舉行七場同程賽事，放頭入直路嘅馬拎到四冠一亞佳績，可見利放唔利追，頭場「天狼星」、六場「有禮」及八場「霸氣」等擅跑泥地之放快馬可優先留意。