立法會噚日繼續審議《2016年撥款條例草案》，上兩個星期都流咗會，如果今個星期再流多次都咪話唔樣衰。其實金融服務界立法會議員張華峰3日前生日，經民聯一班黨友過去都有同佢慶祝，不過今年困喺立法會，惟有畀個小驚喜佢，指定動作都係搵齊人同佢唱生日歌兼吹蠟燭許願再大合照（圖）啦。張華峰笑言出年可以拎長者卡，幾多歲大家心照啦，當住成班黨友講生日願望，梗係行貨啲，話希望經民聯黨務發展越來越好。
生日梗係要有啲表示，林健鋒叫黨內唯一女議員梁美芬餵壽星公食蛋糕，梁當然婉拒啦，仲話「峰哥後生好有吸引力」喎，言下之意係驚自己把持唔住？梁仲笑言，張華峰真正嘅生日願望應該係388（香港交易所）股價真係上到388。