李斯特城禮拜一晚鎖定英超冠軍，班球員狂歡慶祝。喺禮拜二朝早嘅操練後，佢哋晏晝就到李斯特市中心嘅意大利餐廳食飯慶功，大批球迷夾道歡迎。李城將會喺周末主場對愛華頓賽後捧盃，但球會同市政府仲未決定到幾時搞勝利巡遊。
李城班球員禮拜一晚喺占美華迪屋企見證熱刺失分，球隊提早封王，之後大家玩到凌晨四點先返屋企。瞓咗幾個鐘後，球員都準備喺禮拜二朝早10點半操練，但氣氛都好輕鬆。
周末前或定巡遊安排
操練完後，由班主維猜、領隊雲尼亞里等帶領下，李城職球員殺去當地市中心嘅意大利餐廳San Carlo慶功。球迷早就收到風，喺餐廳所在嘅Granby Street聚集，夾道歡迎呢班英雄到場，其中李城球迷卓文好好彩，因為佢個樣九成似華迪，所以被邀請上李城隊巴一齊慶祝，佢仲可以同正版華迪搭住膊頭一齊合照，真係恨死其他球迷嘞！至於華迪嚟緊都幾忙，除咗夏天要幫英格蘭踢歐國盃外，佢仲會喺下半年出自傳。
李城將會喺周末主場對愛華頓嘅聯賽後捧盃，但佢哋未決定幾時搞勝利巡遊。球會、市政府同埋警方仲諗緊點安排數以萬計圍觀巡遊嘅球迷，但當地報章估計今個周末前會有決定。
雲帥：下季都係豪門玩晒
雖然李城今季威到震，但雲尼亞里依然保持一貫嘅低調，佢喺訪問話下季英超都係豪門玩晒，「使好多錢嘅豪門通常都拎到冠軍，大概99%機會都係佢哋玩晒，所以下一季以至未來10到20年，英超都會變番做豪門稱霸。最有錢嘅球隊可以揀晒最好嘅球員，自然容易贏錦標。」雲帥仲話佢唔會喺暑假高價買球星，會繼續一貫嘅足球哲學。另外，李城熱潮席捲李斯特呢個城市，有髮型屋即刻改名做「華迪&馬列斯」，仲有一對李城球迷父母用雲尼亞里個名嚟改自己啱啱出生嘅女個名。