股神畢菲特生於1930年8月30日，就快86歲，精神健康狀態依然不減。佢嘅公司「巴郡」係可口可樂最大股東，股神不單止鍾情可口可樂呢隻股票，更鍾意飲可樂（健怡），每日無可樂不歡；美國近年流行健康飲食風氣，可樂被視為垃圾食品嘅一類飲料，有人話老人家不宜飲用可樂，畢菲特就回應得妙：「可樂令我快樂，比長壽更重要」，又話冇證據顯示每日飲開水與吃西蘭花就會長命百歲。
飲水、食西蘭花，的確淡而無味，幾難餐餐都係，如股神所講，快樂比長壽更重要，都八十幾歲人咯，鍾意食乜就食乜啦，仲要顧住糖份膽固醇，忌食乜乜，忌飲物物，活到一百歲都冇乜樂趣啫。
股神每年吸引四萬名股東到奧馬哈呢個細城市朝聖（呢個城市只有人口約44萬人），帶旺當地經濟不在話下，佢每年俾貼士，今年貼士之一就係中國經濟唔錯，索羅斯擔心過多（按：索羅斯唱衰中國，認為中國經濟硬着陸無可避免），貼士之二係唔好買對沖基金（又係與索羅斯對着幹），因為收費過高，如要買基金，只應買指數基金。
對沖基金及一般互惠基金嘅表現是否跑贏大市，從來都係爭論點，過去一年，所有基金都在掙扎邊緣，睇錯市者比比皆是，我地買基金俾完基金管理費，仲要冇錢賺，又確係幾激氣嘅。基金經理用以投資的是他人的金錢（Other People's Money，簡稱OPM），曹仁超生前最鍾意講，OPM最好使，輸咗自己唔肉痛吖嘛。以前同肥仔K講過OPM嘅道理，佢似明似唔明，4月27日馬會邀請年輕會員到快活谷跑夜馬，有投注比賽，每枱有紙錢一萬元，做投注本錢，肥仔K贏啲輸啲，始終無法突圍，到咗第六場，比賽要決勝負，肥仔K睇馬之後，認為10號大熱門「風火勁駒」係穩膽，配腳係1號「卡加動力」，2號「滿堂紅」，於是下注三重彩，10拖1，2，每注5000元，嘩真係中咗，總派彩係57萬5千元，當然大幅度拋離亞軍，贏得冠軍，獲馬會獎品──餐券五百大元。左丁山聞訊。問肥仔K：「自己有冇用真銀落注100元，贏番5千幾蚊呀？肥仔K話冇呀，用馬會紙錢嚟賭，先至會咁大注重槌，用自己錢就唔敢咯。唉吔，走晒大寶之後，肥仔K就明白晒OPM嘅道理，用人地嘅錢最爽神！