手遊公司Supercell最近有隻新game《皇室戰爭》（Clash Royale），吸引到小米創辦人雷軍注意，噚日雷軍更用旗下「小米直播」App，直播自己打Clash Royale。
截圖中，雷軍用嘅手機，相信就係即將發佈嘅新手機小米Max。一見雷總直播，唔少員工立即加入公會，疑似擦鞋咁話要挑戰雷總。
雷軍嘅網名叫做「淡淡的……」，佢似乎幾鍾意隻game。據知，小米一眾高層好鍾意打機，之前另一隻game《列王的紛爭》（Clash of Kings），每人「課金」幾萬至十幾萬人仔。唔知雷軍會否進一步課金，直接投資Supercell呢？
Supercell嘅吸金力一向唔弱，有報告指，3月《皇室戰爭》單喺美國已錄得1.44億美元（約11.2億港元）收入，遊戲喺香港iOS平台收入亦高踞榜首。