近期港股飄忽，長短線暫時都未見搵食空間，大家寧願關心日圓滙價多過股票，一心諗住生意淡薄、不如敗家，點知日圓嘭嘭聲升，不禁倒抽一口涼氣。其實承繼近年傳統，滙市波幅大，伴隨嘅係環球股市偏弱。換句話說，股市難賭嘅同時，滙率往往出現機會。
踏入今年，大家見識過日本央行狼狽嘅一面，最近其貨幣政策按兵不動，市場認為佢已露底無招可出，令日圓再次衝高。喺環球宏觀環境冇大改變之下，日本央行其實幾大機會繼續狼狽下去，從基本因素出發，日圓的確有再升空間，風險係再升下去，日本央行隨時會干預，一旦真出手，但日圓消化消息後再展升勢，就係入市call yen之最佳劇本。
每百日圓兌港元由舊年低位6.2算左右，升到最近高位接近7.4算，從5年圖去睇，目前剛剛營造大圓底，仲要去到7.5、7.6算先觸及頸線位置，現水平遠遠未去到貴嘅水平。另外值得留意，日圓兌港元滙價嘅14天RSI，上下波幅由弱勢時嘅20至60範圍，逐步升到40至80範圍，反映長線走勢轉強。如果見圓滙回吐或者短期內日央行干預滙市而下跌，已經係一個唱錢或低吸日圓的機會。滙市始終唔容易估，以價外option call日圓，唔犯本地小注博大贏，不妨一試。至於股市，暫時保持不悲觀心態，去等入市機會。
晉佳
http://www.facebook.com/advanceguy1