香港又熱又濕，出汗後唔沖涼，點敢見人？日日要沖涼，沐浴露自然用得多，格價尤其重要。去連鎖店購物，經常看到甚麼優惠，好似好抵咁，但除返開條數，在細藥房買1000毫升的大瓶裝沐浴露，仲抵過連鎖店的掩眼法優惠。以多芬 Dove 滋養柔膚沐浴乳 (滋養柔嫩配方)為例，最平的惠康、屈臣氏，每支750毫升裝賣$38.9。但在的旺角國城大藥房、新達安藥房以及中僑中西藥業，1000毫升裝只賣$27至$35元不等，肯肯定平過連鎖店。就算屈臣氏推咩「買產品送TIMOTEI試用裝」，都為唔返條數！
另一款強生Johnson's pH5.5潔膚沐浴露，驟眼睇喺惠康、百佳、Market Place買會平些，但貨品容量係750毫升，將價格除以容量，就會發現，每毫升售價依然貴過細藥房好多。最有趣係，屈臣氏推出750毫升x3支裝優惠，售價$72.9，雖然算連鎖店中最平，但捆綁式銷售下，都係貴過細藥房，你話合唔合理？連鎖店唯一好處，係貨品比較齊全，以呢款沐浴露為例，唔係間間細藥房都有得賣，但在連鎖店貨品供應較穩定。
格價日期：2016年5月2日至5月3日。
記者：彭海燕
