「法治」呢個議題有幾沉重？或者經民聯立法會議員梁美芬可以話過你知。話說噚日梁美芬call晒班法律界好友，齊齊到立法會開反港獨記招，原本準備咗一塊寫住「珍惜法治 反對港獨」嘅橫額，打算掛喺牆上做背景。但可能「法治」真係唔係個個撐得起，八方見到工作人員喺現場，揸住卷水喉膠紙，好有心機咁想黐實張banner（圖），點知唔夠半分鐘，「嘭」一聲成幅跌落地下。有行家見到呢個畫面，不自覺咁感嘆咗句：「今次真係法治崩壞。」卒之搞咗一大輪，梁美芬同工作人員都決定放棄，將「法治」擺埋一邊就算。
而臨開記招之前，立法會大樓繼續響起點人鐘聲，為咗唔想因為少咗自己而流會，梁美芬決定落樓下點完人數先上番嚟，仲同班老友講：「嗱，你哋見識到乜叫點人鐘啦。」