傳統「五窮六絕」，5月一開閘嘅時候，港股兩日加埋跌500幾點，但A股就一度撲上3000點！喺港股冇乜焦點的情況下，都係跟住A股概念去炒股。要食中升浪，可以喺已出名殘到半死不生中尋寶，其中白酒業絕對係博反彈之選！話說呢兩日A股白酒股多隻升停板，星期二18隻白酒A股中，就有8隻漲停，貴州茅台股價創新高，氣勢如虹。
今次白酒股嘅升浪，係有基本因素支持！據一眾白酒股公佈嘅2015年業績，只有3間錄盈利倒退，比起過去2年，分別10間同13間大幅減少，證明行業走出低谷！買白酒股最直線係買名酒代理商銀基（886），公司2月時已發盈喜，指全年業績轉虧為盈。公司喺半年業績時已講過，經銷商已極少囤貨，而高、低端白酒銷量回升，經過13年「限制三公消費」後，行業到今日似乎已調整完結，回歸理性。目前內地高端白酒已開始加返價，證明行業已步入復蘇。
銀基股價最衰嘅時候係上年3月，見過0.79元。不過，以最新價計，股價自2011年高位8蚊水平跌足85%。近日股價已成功破旗，基本因素好，加上板塊當炒，天時地利人和配合，相信銀基「坎坷過後有艇搭」，是時候大反彈了！
Fifi
http://www.facebook.com/lovefrystock
本欄逢周四刊出