潘頓日前胃痛冇操馬，之後又因體重上升，輕磅馬「大爆發」要換人，身體狀況再惹起馬迷關注。但呢位前季冠軍騎師，這晚轉戰谷草有番水準演出，並於第五場四班1200米策「金碧旺旺」後上一攻而破，個人順利重響勝鼓，而此駒取得季內第二捷，單Win及組合獨贏A2，分別派44及22.5元。
潘頓太太Nicole的妹妹Sarsha近日來港，這晚悉心打扮低胸露膊裝，與姐姐一齊為姐夫打氣，結果潘頓沒有令她們失望。
「金碧旺旺」前仗贏谷草一哩開齋，再出跑番同一路程卻三甲不入，今期有四班一哩唔報，反為行使出賽保護權大幅縮程報戰1200米，呢招果然使得，贏到超晒班咁款，練馬師蘇保羅可謂出奇制勝。
今場一對輕磅馬「紅褲精神」及「駿擊快車」，分別由蔣嘉琦及黎海榮跑第二及第三，第四名係寶遜半冷門「飛馬看花」，四重彩派一萬七千幾。
「金碧旺旺」馬主金星根表示，愛駒上仗途中踢中自己，右前腿不良於行兼氣管有血，亦所負甚近，賽後蘇保羅讓牠有足夠時間休息，培養出新鮮感，因此今仗短途也可勝出。金星根表示由於馬兒今仗跑來前速不快，下仗多數會跑番一哩，希望牠下季五歲更為成熟，有更進一步演出。