自由黨喺新一輪港大民調中以44.7分首次奪得十大政團第一位，不過自由黨榮譽主席田北俊（圖）似乎仲未滿意，話排第一都未合格，大家都要再努力。佢又話自從facebook改咗抽水式呃like後，確係多咗好多人留意佢哋訊息，但好質疑有幾多like可以轉化為選票，所以都提黨友落區同網上宣傳都要做好。
講開自由黨，田少話之前上水鄉委會主席侯志強畀咗封退黨信自由黨，不過自由黨仲未處理，因為侯封信係寫因組黨而退黨，但侯志強個黨仍未組得成，田少話如果佢最後組唔成，好希望對方喺立法會選舉可以繼續同自由黨合作。
田少講完香港政治，又講埋美國總統選舉，笑言唔明點解咁多人信特朗普講嘅嘢，不過問佢如果有票會投畀邊個，佢竟然都話支持特朗普，皆因對方都係搵番共和黨人組班，「佢唔似我哋特首，三司十二局唔理，70個立法會議員一票都冇，都可以繼續想做就做。」