今年美國英雄電影一部接一部，最近上映嘅《美國隊長3》真係好睇，亦不得不佩服電影公司咁多年嚟嘅鋪排，一路將幾個唔同系列嘅英雄電影大故事延續發展，背後自然有精密計算，有呢個勝利方程式，Marvel推出嘅電影套套大賣就自然係意料之內。
西甲聯賽喺今季嘅爭標形勢，係近年難得一見咁緊湊，巴塞隆拿、馬德里體育會同皇家馬德里最多都只係相差一分。如果係抱鋤強扶弱心態，就自然希望馬體會可以繼2014年之後再贏一次聯賽冠軍。論球會財力，馬體會自然唔及巴塞皇馬，近年幾乎每季都有主力被挖走，近10年先後有費托、阿古路、法卡奧、迪基亞、迪亞高哥斯達先後走人，但佢哋勝在夠眼光，買到好球員之餘又有優質青訓產品，照住呢個方程式去運作得出近年嘅好成績。今季除咗喺西甲可以抗衡巴塞皇馬之外，仲啱啱搞掂埋拜仁打入歐聯決賽，認真犀利。
馬體會喺上輪西甲主場迎戰華歷簡奴，為歐聯留力，只係得番幾個一隊主力正選披甲，但踢法同表現都冇太大跌watt，依然係低控球率，靠高壓逼搶制造快速反擊，結果由後備入替嘅基沙文把握一次機會搞掂，連續三場聯賽小勝1:0。對拜仁場波，出返晒主力都係堅固防守加快速反擊，未必好好睇但就依然有效。基沙文同埋恩歷克卡拉斯高等球星或者會喺今夏高價被賣走，但個別球員離隊對馬體會嘅影響未必太大，球會可能驚教練施蒙尼（圖）走人多過基沙文離隊。
文：何西