馬德里體育會入到歐聯決賽，嚟緊又要爭西甲冠軍。巴塞隆拿同馬體會家陣一樣分，而皇家馬德里就少佢哋一分，呢三隊真係鬥到難分難解。相比巴塞同皇馬財力豐厚，馬體會出手較低，所以留住球星嘅能力比較差。嚟到季尾，傳媒又開始吹其他豪門挖馬體會嘅球員，但小弟認為大家要小心，施蒙尼麾下呢班球員可能好睇唔好用。
小弟覺得馬體會同多蒙特、李斯特城嘅踢法有啲似，講求整體，唔會話冇咗邊個好大件事，同埋睇落每個球員嘅工作都差唔多，唔會有一個明顯嘅核心。只要每個球員做好本份，成個團隊自自然然有超水準發揮，所以呢類球隊嘅核心其實就係個教練。馬體會每個球員都係零件，主帥施蒙尼先係靈魂，就算唔見咗一兩件零件都冇問題，靈魂喺度就可以。巴塞同皇馬就相反，陣中球星先係靈魂，教練嘅主要工作係處理好更衣室嘅關係，等班球星開開心心踢波。
其他球隊見馬體會咁勁，自然想羅致佢哋嘅球員，再加以重用，但好多時效果未如理想。最佳例子係馬體會左閘菲臘路爾斯，喺馬體會成名時簡直好似世界最佳左閘一樣，但轉會車路士踢唔番水準，但一返去馬體會，又如魚得水。菲臘路爾斯係施蒙尼呢部機器入面嘅超級零件，但一離開咗呢部機器，就大打折扣。基比同桑法蘭托里斯都係類似，個人能力唔算好高，但喺馬體會嘅戰術入面發揮得非常好。
喺呢班馬體會主力入面，小弟覺得基沙文（圖）最有潛質喺離隊後都保持到水準，因為佢之前踢皇家蘇斯達時都成功，反而佐治高基雖然外界評價唔錯，但有可能會係個中場版嘅菲臘路爾斯。
文：咖喱