賣開鞋嘅盈進（Walker Group，1386），今年初易主，新主人係內地商人朱曉軍，佢有間中國消費養老控股，原本由賣鞋變為養老，已經夠奇特，盈進噚日宣佈，透過配股，引入有105年歷史嘅意大利職業球會AC帕維亞做股東，持股9.09%，成件事係咪更加有趣呢。
都說中國人嘅世界最緊要講關係，盈進配股畀AC帕維亞，其中一個原因，應該係AC帕維亞其中一名主要股東係朱曉軍胞兄。
盈進指，AC帕維亞與意大利職業足球聯賽上個月，就喺中國推廣意大利足球文化與營銷簽訂合作協議，盈進可以通過球隊喺內地合作開設意大利足球相關嘅專賣館，從而推廣意大利足球文化云云。講到尾，大家都知國家主席習近平熱愛足球，上市公司同足球拉上邊，背後原因，大家都明喇。