港超聯周六先煞科，不過，冠忠南區噚日搶先開記招公佈下季動向，隊中華將九成九留低，贊助商仲推出多個「持續進修計劃」，等球員可以為退役鋪路。今季800萬班費嘅南區，銀牌決賽不敵東方，足總盃亦殺入四強，聯賽有機爭前三，會長黃良柏及主席陳文俊當然收貨，講明下季會加班費喎。陳主席透露有球員被挖角，所以早啲同球員傾續約。煞科戰鬥南華嘅南區，準備咗500個Q版球衣攬枕送畀球迷，先到先得。