患有腦癱嘅基格（Josef Craig、圖）喺倫敦殘奧400自奪冠後，決定將奧運五環同一隻紅藍相間嘅獅子紋上左胸作為紀念。點知，呢個紋身竟然令佢喺周一舉行嘅歐洲錦標賽100自被取消資格！賽會事後解釋，話一早已經同參賽者講過呢類紋身算係幫奧運賣廣告，所以呢位19歲英國泳手冇遮住晒成個紋身出賽已經係違規。基格喺本周仲會出戰50自同400自，希望佢到時記得遮實個紋身喇。