港交所（388）又有人事變動！現貨交易主管勞偉強今年2月已經榮休，行政總裁李小加終於搵到人接替佢，呢位仁兄叫做郭家強（Kenneth），名字同財經事務及庫務局局長陳家強一樣之外，兩位仲有一個共通點，就係同樣讀過美國芝加哥大學。
眾所周知，陳家強與兩位公子都係讀芝加哥大學，陳家強獲芝大頒授工商管理碩士和財務學哲學博士學位，咁啱港交所新請番嚟呢位強哥，亦係芝大經濟系畢業。
強哥1999年開始投身金融服務業，加入港交所之前，係高盛亞洲證券部駐香港執行董事，聞說佢負責結構性產品設計與買賣，咁應該好熟悉市場交易運作喇。
據講，佢去到港交所，主要負責同證券商溝通，以後有關市場測試、互聯互通等等，都由佢幫交易所做溝通橋樑。不過佢做慣外資大行，唔知能否同一班本地券商溝通到呢？