新東補選中得票最少，但都多票過梁特嘅「體雕大狀」梁思豪，噚日正式申報選舉開支。原來佢今次選舉只用咗5,472蚊，平均每票2.9蚊，難怪佢話抵過平均每票近11蚊的民記周浩鼎好多，但最離奇係，佢申報選舉開支竟包括一套葉問戲服！
梁思豪同八方解釋，指參選時諗過拍微電影，扮葉問一個打十個，表達唔怕單打獨鬥嘅訊息，可惜最終因朋友太忙拍唔成，笑言呢套300蚊戲服，應該係朋友喺淘寶淘番嚟。
梁思豪又用咗1,900蚊整4個易拉架，但原來一次都冇用到，因為團隊太少人，埋唔到班落區，佢又覺得參選經驗好寶貴，但預告再參選機會不大，因為嚟緊9月大把人參選，自己勝出機會唔大喎。