喺內地賣自家品牌產品，如果事前冇做足商標註冊，隨時一個唔該俾人告番轉頭。專賣保健品與嬰幼兒產品嘅衍生（6893），老闆彭少衍都話，好在一早為賣緊嘅所有產品註冊晒商標，唔擔心俾人告抄襲。
最近城中熱話，應該包括美國運動品牌New Balance，喺內地嘅關聯公司被指侵犯他人商標專用權而被罰款接近1億元人仔。
彭少衍就話，公司對呢類事情早有準備，喺各地市場都註冊咗中英商標。
不過佢都唔係完全冇後顧之憂，如果將來為新產品喺內地註冊，佢都有啲頭痕，事關𠵱家喺內地註冊中成藥商標，起碼都要500萬元人仔一個，仲要按每個產品類別計數，分得好仔細；而就算畀你諗到個好名，又可能一早被人註冊咗，所以都要諗計。