挪威與委內瑞拉兩個國家，國情大大不同，只有一樣嘢係大家一樣，就是大家都擁有極豐富石油儲藏量，石油價格高企嘅時候，兩國想話窮都幾難。
但挪威係一個文明教育國家，有深厚民主傳統，即使係推行民主社會主義，對國民生活照顧到無微不至，國民仍然唔會容忍國家走獨裁路線，實行君主立憲，行高稅政策，而有一樣最重要嘅，就係善用石油資源，一於好天收埋落雨柴，將石油開採出口利潤，攞一部份做國家退休基金，好景時賺油價，賺投資利息，賺埋股價，一路滾存，於是挪威國家長俸基金（環球）於2015年6月已達八千七百三十億美元，挪威人永不愁窮，可見得在有效的民主監督之下，行社會主義色彩濃厚的經濟政策，只要有天賦資源，還可以負擔得來。
委內瑞拉的石油儲藏比挪威更多，也行民主選舉總統制，可惜國家不幸，以前選出了一位民粹社會主義，反美親古巴狂人查韋斯做總統，此人為求選票，趁委內瑞拉窮人多，富翁少，實行派糖派福利政策，贏得絕對性國會控制權，跟住就修改憲法，令總統可以連選連任，鎮壓反對黨，箝制新聞自由，對外則反美，向拉丁美洲窮國派錢，支持鼓勵佢地反抗美帝國主義。狂人以為石油價會長期高企，油錢長使長有，根本唔識得向挪威學習。
好嘞，狂人染上癌症死咗，留下爛攤子由馬杜羅總統繼承，呢位馬杜羅又係反美親古巴之輩，卒之搞到委國現在通脹高達500%，石油價大跌之後，國庫空虛冇晒錢，委內瑞拉貨幣冇人要，最近又賴氣候轉變，令水庫缺水，水力發電不足，全國緊急推行輪替式停電共40天，然後又話每星期工作兩天以節省能源，令全國陷於半停頓。委內瑞拉有咁多石油，居然發電要靠水力？原因係查韋斯、馬杜羅不識趁好時光利用石油推動經濟，石油生產全部除自用外，皆出口賺外匯，石油發電廠都唔興建到夠，去年GDP下跌5.7%，今年預料下跌8%，所有基本物資缺乏，缺麵粉，缺糖，缺雞蛋，委內瑞拉人到超市買嘢，要排隊幾小時。以前好似係佛利民講過，如果用共產管制主義嚟治理中東，中東都會缺沙！依家就係咁，一個坐在石油油田之上嘅國家，窮到冇錢開採石油，缺乏石油發電廠。社會主義落在文盲民粹之手，可以害死好多人，老毛以前搞人民公社大躍進，就係呢類貨色。