般尼喺周一嘅英冠聯憑住前鋒禾基斯一箭定江山，以1:0擊敗到訪嘅昆士柏流浪，而由於同日第三位嘅白禮頓只能打和打比郡1:1，加上白禮頓之後會喺聯賽鬥次席嘅米杜士堡，所以般尼以45戰得90分，提前一輪聯賽獲得升班資格。係人都知，英超係大金礦，預計般尼重返英超，可以獲得二億鎊（約23億港元）嘅收益，所以由領隊戴治（白衫）到球員，個個喺賽後都笑到見牙唔見眼。