本地商界入面，一提起冰上曲棍球，就不得不提合和（054）太子爺胡文新（Thomas）。Thomas年輕時熱愛打冰曲，最擅長打後衞，佢打理家族生意後，雖然冇咁多時間落場，但熱心推廣呢項活動。
噚日MegaBox舉辦「Mega Ice五人冰球賽」，身兼香港業餘冰球會主席與國際冰球聯合會副會長嘅Thomas當然到場支持。
Thomas一講冰曲就好醒神，話好開心𠵱家多咗人認識冰曲，可惜香港仍然唔夠「冰場」，佢keep住跟政府與其他發展商研究，希望可以增加冰場數目，吸引市民到商場嘅同時，亦可以推廣運動。
噚日主辦單位亦特意將傳統嘅中國舞龍帶到冰上，相當有特色。