政務司司長林鄭月娥向被喻為「好打得」，但佢同老公林兆波嘅愛情生活係點呢？噚日佢接受商台訪問時真情剖白，原來當初佢加入政府後，按例保送去英國劍橋進修。林鄭形容第一次到英國，心情好興奮，一興奮個人鬆懈，卒之有次踩單車時發生交通意外，斷腳要瞓3、4個星期醫院，仲見埋報。
當時都喺劍橋讀書嘅林兆波得悉，就同一班劍橋香港留學生去探林鄭，於是兩個人就識咗。雖然林鄭冇分享究竟係邊個追邊個，但就讚賞林生份人好簡單，簡單到連特區班子中，見過佢嘅人都寥寥可數。林鄭話，保安局局長黎棟國就係其一，一來兩人係中學師兄弟，二來林鄭同黎棟國識於微時，早年佢哋兩個仲係𡃁嗰陣合作過，於是就見過林生。
林鄭亦都分享加入梁班子呢幾年嘅心路歷程，佢話自己冇後悔，亦覺得呢幾年係得多過失。不過講到最開心嘅日子，莫過於2012年放假去英國探仔，相信出年退休後，第一件做嘅事亦係探仔喎。