一條電線值70萬？你冇睇錯，2005年成立嘅堅固證券，因為一條電話電線鬆脫，由2013年5月到2014年1月，足足8個月，都唔知道，期間嘅客戶電話交易指示完全冇錄音，結果俾證監罰款。
堅固證券發現咗條電線鬆脫，插番接駁嘅時候，已經係1月2日，神奇在，短短6日之後，證監會要求堅固證券交出若干錄音，咁就當然交唔出喇。
證監會就因為呢間經紀行冇為電話錄音進行例行檢查，亦冇定期審查客戶電話交易指示嘅錄音，噚日決定譴責，並罰款70萬元。
張華峰認為一時疏忽
以往幾單關於電話錄音嘅執法例子都相對輕手，例如2011年時富證券胡健聰、2013年招商證券（香港）鄧惠珍，因為用手提電話接受交易指示，冇用中央電話錄音或者書面覆盤，各被證監會罰款4萬蚊。
恒豐證券創辦人張華峰（肥老闆）聽到呢單「堅固」嘢就氣上心頭，佢話只係一時疏忽，「根本有時電話線斷咗都唔知」，講到激心時仲搬埋個特別嘉賓出嚟邪一邪證監會班洋人，佢話：「就算你黃大仙都有時會做錯嘢吖嘛！」
肥老闆身兼立法會議員，深明維持市場秩序好重要，但佢覺得電話線鬆脫，同大行出窩輪殺散戶、莊家圍飛炒殼股，嚴重程度不同，質疑證監「呢啲你又唔去查？」講到底，佢都係為細行抱不平。
不過話說回來，萬一出事，客戶落盤與覆盤嘅電話錄音係重要嘅，惟有當係買個教訓，各大小證券行，以後記得check電線、電話線嘞。
李華華
mailto:[email protected]